Оштун Кара-Суу районундагы Мамажан айыл аймагында элдин үшүн алган чөөлөр табылган жок, эл мурункудай кооптонбой, тынчтанып калды. Бул туурасында Sputnik Кыргызстан агенттигине Жоош айыл өкмөтүнүн башчысы Жылдызбек Тиллабаев билдирди.
"Чөөлөрдү атып жок кылуу үчүн Кара-Кулжадан атайын мергенчилерди чакырганбыз. Алар бир жума бою чөөлөрдү издешти. Бирок бирөө да табылган жок", — деди айыл өкмөттүн жетекчиси.
Ал атайын чакырылган мергенчилер учурда Мамажан айылындагы жолбун иттерди атып жаткандыгын кошумчалады.
Эскерте кетсек, сентябрь айында Кара-Суу районуна караштуу Мамажан айылынын тургундары аймакта чөөлөр пайда болуп алар мүрзөлөрдү казып, маркумдардын сөөктөрүн жеп жатканын билдиришкен. Бул көйгөйдөн арылуу үчүн Жоош айыл өкмөтүнүн мал чарбасы, ветеринария боюнча жетектөөчү адиси Жолдубай Жоробаев аңчылык департаментине кайрылуу жолдогон. Мындан улам Кара-Суу райондук прокуратурасы чөөлөр тууралуу маалыматты иликтөөгө алган.
