БИШКЕК, 5-окт. — Sputnik. Португалиянын мурдагы премьер-министри Антониу Гутерреш Бириккен Улуттар Уюмунун Башкы катчысын шайлоодо фаворит катары чыгып жатканын Россиянын БУУдагы туруктуу өкүлү Виталий Чуркин билдирди.
Анын айтымында, расмий добуш берүү бейшемби күнү болот.
"Бүгүн добуш берүүнүн алтынчы раундунда бизде фаворит аныкталды. Анын аты Антониу Гутерреш. Формалдуу добуш берүүнү биз эртең менен саат 10.00 (Бишкек убактысы боюнча 20.00) өткөрүүнү чечтик", — деген Чуркин.
Шайлоодо алдыга озуп чыга турчу талапкердин атын атоо үчүн журналисттерге Коопсуздук Кеңешинин 15 мүчөсү тең чыккан.
21-июлдан тарта Кеңештин мүчөлөрү добуш берүүнүн 5 раундун өткөрүштү. Анда лидер катары Португалиянын мурдагы премьер-министри Антониу Гутерреш чыккан. БУУнун учурдагы башкы катчысы, Түштүк Кореянын мурдагы Тышкы иштер министри Пан Ги Мун кызмат ордун 2016-жылы 31-декабрда тапшырат. Ал аталган кызматта он жыл иштеди.
