БИШКЕК, 30-сен. — Sputnik. Тартип коргоочулар жол кыймылды жөнгө салган "элдик кызматкерди" кармады деп билдирди борбор калаанын милициясынан.
Маалыматка караганда, 19 жаштагы жигит Юнусалиев – Суеркулов көчөсүнүн кесилишинде өзү билип эле көчөдөгү автоунаа кыймылын жөнгө салып, жол кырсыгын жарата турган жагдай түзгөн.
Милиция эгерде шаардагы жол чырактар иштебей калса, жол кыймылын өзүм билемдик кылып жөнгө салууга болбой тургандыгын эскертет. Бишкек шаардык ички иштер башкармалыгы мындай жагдайга күбө болгон шаардыктарга 102 номерине же Кайгуул милициясынын башкармалыгынын 0 (312) 53-01-81 и 0 (312) 53-22-33 телефондору аркылуу кайрылууну суранат.
Буга чейин Бөкөнбаев — Абдрахманов көчөлөрүнүн кесилишинде, да ушундай окуя кайталанып, жетип келген милиция автокыймылды жөнгө салган "элдик кызматкерди" издеп таппай калган.
