БИШКЕК, 23-сен. — Sputnik. Шабдан баатыр көчөсүндө оодарылып кеткен маршруттук таксинин айдоочусу эки жыл мурун гана айдоочулук күбөлүк алганын Бишкек ШИИБ билдирди.
Эскерте кетсек, бейшембиге караган түнү Бишкектеги Шабдан баатыр көчөсүндө "Форумдун" имаратынын жанында маршруттук такси ала салып, бир нече киши жабыркаган. Жүргүнчүлөрдүн арасындагы жаш кыздын колун кесүүгө туура келген.
"Маршруттук таксинин айдоочусу учурда камакка алынды. Ал убактылуу кармоочу жайда кармалууда. Тергөө учурунда айдоочулук күбөлүктү 2014-жылы гана алганы маалым болду", — деп айтылат маалыматта.
Учурда Бишкек ШИИБ аталган окуя боюнча юридикалык баа берүү үчүн Башкы прокуратурага кайрылгандыгын кошумчалады. Мында болгону эки жылдык тажрыйбасы бар айдоочу кантип ишке орношкону аныкталышы керек.
Алдын ала маалыматтар боюнча айдоочу 28 жашта. Ал "Мейкин" фирмасында иштеген. Ага карата Кылмыш жаза кодексинини 281 беренесинин 2 бөлүгү боюнча (Транспорт каражатын айдаган адам тарабынан транспорт каражаттарынын кыймылынын жана пайдалануунун коопсуздук эрежелеринин бузулушунан улам жабырлануучунун саламаттыгына оор зыян келтирүү) кылмыш иши козголду. Аталган беренеде 5 жыл эркинен ажыратуу каралган.
