Ала салган маршрутка: ишкана айдоочунун тажрыйбасы эки жылдан ашарын айтты

БИШКЕК, 23-сен. — Sputnik. Жүргүнчүлөрү менен жол кырсыгына кабылган маршруттук таксиге ээлик кылган "Мейкин" ишканасы айдоочуну жумушка кабыл алууда эч кандай мыйзам бузууга барбаганын билдирди.

Эскерте кетсек, шаршембинин түнүндө Шабдан баатыр көчөсүндөгү "Форумдун" жанынан маршруттук такси аласалып кеткен. Ичиндеги тогуз жүргүнчү жабыркап, бир жаш кыздын колун кесүүгө туура келген.

Кийинчерээк Кайгуул милициясы эки жылдык гана тажрыйбасы бар айдоочуну жумушка алган ишкананын аракетине юридикалык баа берүү боюнча прокуратурага кайрылып жатканын маалымдаган. Ал эми мыйзам боюнча атайын унаада жүргүнчү ташууга кеминде 4 жылдык тажрыйбасы бар айдоочуга гана укук берилет.

"Эки жыл мурун D категориясына ээ болуптур. Ал эми айдоочулук күбөлүктү 2012-жылы алган экен. Биз аны жумушка алып, эч кандай мыйзам бузган жокпуз. Бизге чейин жигит башка жүргүнчү ташуучу фирмада 1,5 жыл иштептир", — деди "Мейкин" ишканасынын директору Мелис Кудайбергенов.

Учурда ала салып кеткен маршрутканын айдоочусу 28 жаштагы жигит экени белгилүү болду. Ага карата Кылмыш жаза кодексинини 281 беренесинин 2 бөлүгү боюнча (Транспорт каражатын айдаган адам тарабынан транспорт каражаттарынын кыймылынын жана пайдалануунун коопсуздук эрежелеринин бузулушунан улам жабырлануучунун саламаттыгына оор зыян келтирүү) кылмыш иши козголду. Аталган беренеде 5 жыл эркинен ажыратуу каралган.