БИШКЕК, 17-сен. — Sputnik. АКШ президенти Барак Обама президент Алмазбек Атамбаевди туулган күнү менен куттуктады. Бул тууралуу КР президентинин аппаратынын маалымат кызматы кабарлады.
"Америка элинин атынан сиздин 60 жылдык туулган күнүңүзгө карата менин чын дилден чыккан куттуктоомду кабыл алыңыз. Сиздин элди өнүгүүгө багыттаган демократияны чыңдоого болгон аракетиңизди абдан баалайм. Борбор Азиядагы сиздин демократиялык лидерлик ордуңуз аны ырастайт. 25 жылдын ичинде Кыргызстан жана АКШ абдан бекем мамилелерди түзө алды жана мен бул кызматташуу мындан ары дагы өнүгөт деген ишеничтемин", — деп айтылат куттуктоодо.
Белгилей кетсек, бүгүн, 17-сентябрда Алмазбек Атамбаев 60 жашка толду.
