БИШКЕК, 14-сен. — Sputnik. Пайда табуу максатында жаш кыздарды Сирияга, "Ислам мамлекети" эл аралык террористтик уюмуна азгырып жүргөн эки аял соттолгонун Жалал-Абад облустук сотунун маалымат кызматы билдирди.
Соттолгон аялдар жаш кыздарды террористтик уюмдун катарына кирүүгө азгырып, Интернет аркылуу сүйлөшүүлөрдү жүргүзүп келишкени облустук сот тараткан билдирүүдө айтылат.
"2015-жылдын апрель айында тергөөдө аты-жөнү аныкталбаган "А" жана "А-А" аттуу кишилер интернет сайттары аркылуу И.М.Б. аттуу жаран менен аны эл аралык террористтик уюмга "шахид" катары жалдоо үчүн таанышкан. Аны менен тынымсыз диний темага байланыштуу аңгемелешүүлөрдү жүргүзүшкөн. Сириянын өкмөттүк аскерлерине каршы террористтик уюмдун куралдуу кол салуулары тартылган видеолорду жиберип турган", — деп айтылат маалыматта.
Алар И.М.Б. аттуу жаранга жана анын башка таанышына паспорт жасатып, авиабилет сатып алуу аракеттерин көргөн. Ал үчүн "А" аттуу жаран акча которгон.
"2015-жылы 6-июлда эки жаранга "Ош — Стамбул" багыты боюнча 9-июлга авиабилеттерди сатып алышкан. Ошондой эле алардын ата-энесинин уруксатын жасалмалап, аларды нотариус аркылуу күбөлөндүргөн", — деп айтылат облустук сот тараткан маалыматта.
Эки аял тең Кылмыш жаза кодексинин жалданмачылык жана документтерди жасалмалоо беренелери боюнча айыпталды.
