Өзбек тарап кармап кеткен кыргызстандыктар аларга карата күч колдонулбаганын билдиришти.
БИШКЕК, 9-сен. — Sputnik. Үңкүр-Тоодогу "Кербен-24" станциясынан Өзбекстандын милиция кызматкерлери тарабынан кармалып кеткен кыргызстандык төрт жаран бүгүн түнү мекенге кайтарылды.
Нурбек Усупбаев менен Жеңиш Ташматов Sputnik Кыргызстан агенттигинин кабарчыларына кандайча кармалып жана жарым айдын ичинде баштарынан эмне деген күндөрдү кечиргенин айтып беришти.
Үңкүр-Тоогодогу телемунарада иштеп жаткан жеринен колуна кишен түшүп кармалып кеткен Жеңиш Ташматов
Кербен шаарынын тургуну Нурбек Усупбаев Өзбекстандын убактылуу кармоочу жайында отурган мезгилде ага карата күч колдонулбаганын билдирди.
"Үңкүр-Тоодогу станцияда күндөгүдөй эле жүргөн элем. Бир маалда өзбек чек арачылары келип документ сурашты. Жанымда паспортум жок болчу. Ошол замат колума кишен салып эле алып кетишти. Убактылуу кармоочу жайда күч колдонулбаганы менен моралдык жактан кысым болуп жатты. Күндө "сени 10 жылга кесебиз" деген сыяктуу сөздөр айтылып жатты", — деп билдирди Усупбаев.
Ал өзү билдиргендей ден соолугу жакшы. Тамак-аш өз маалында берилип турган.
Кармалган жарандардын дагы бири Жеңиш Ташматов аларга кысым көрсөтүлбөгөнүн ырастады.
"Буюрса баары жакшы. Бизге кысым көрсөтүп жаман мамиле жасашкан жок. Мамлекеттик жетекчилер менен күч органдары сүйлөшүүлөрдү жүргүзүп тил табышканы жакшы болду", — деп билдирди Ташматов.
Учурда Sputnik Кыргызстан агенттигинин кабарчысы үйүнө кайткан мекендештердин калганы менен байланышууга аракет көрүп жатат.
Белгилей кетсек, 22-августта талаш жараткан чек ара аймагына Өзбекстандын күч кызматкерлери тик учак менен конгон. Ал эми 24-август күнү алар Кыргызстандын төрт жаранын кармап кетип Яңги-Курган ички иштер бөлүмүнө киргизишкен. Бара-бара өзбек милициясынын саны 20 адамга жеткен.
