БИШКЕК, 8-сен. — Sputnik. Көчмөндөр оюнуна Зимбабведен келген Эбест Муррури анын өлкөсү Кыргызстандан көп айырмаланбай турганын айтып берди.
Эскерте кетсек, Чолпон-Атада II Дүйнөлүк көчмөндөр оюну өтүп, ага 62 мамлекеттен келген спортчулар катышып жатат.
Балбандын айтымында, ал алыш боюнча таймашта күч сынашууга келген.
"Спортчулар абдан көп экен, медаль алар-албасымды билбейм, бирок абдан аракет кылам", — деди Муррури.
Ал Кыргызстан Зимбабвеге абдан окшош экенин, мындан улам өзүн чоочун кишидей эмес, өз үйүндө жүргөндөгүдөй сезип жатканын айтты.
"Климаты, жаратылышы, тоолору, суусу — баары абдан окшош экен. Бизде болгону кар жок, анан биякка караганда жылуураак", — деди спортчу.
Чет элдик балбан кыргыздардын тамагы абдан майлуу экенин айтып, жылкы этинен ашказаны ооруп чыкканын белгиледи.
Муррури кыргызстандыктардын эч жакка шашпаган жай баракат жашоосу абдан таң калтырганын жашырган жок.
"Эмнеге баарыңар кечигип, убакытты баалабайсыңар? Мен ушуну түшүнбөй койдум. Ыктыярчылар бул улуттун өзгөчөлүгү экенин айтышты. Антсе да жашоо бирөө эле да, убакытты туура пайдаланыш керек деп ойлойм", — деди спортчу.
ДКО программасына улуттук спорттун 26 түрү кирген. Sputnik Кыргызстан агенттиги Оюндардын расмий медиаөнөктөшү болуп саналат.
