БИШКЕК, 6-сен. — Sputnik. Президент Алмазбек Атамбаев бүгүн, 6-сентябрь күнү Коргоо кеңешинин катчысы Темир Жумакадыровду кабыл алып, чек ара маселесин талкуулады. Бул тууралуу өлкө башчынын маалымат кызматы билдирди.
Жолугушуу учурунда президент улуттук коопсуздукту камсыздоо, терроризмге каршы күрөшүү боюнча көрүлүп жаткан аракеттерден кабар алды. Мындан тышкары, Кыргызстандын төрт жаранын өзбек тараптын кармап турушуна байланышкан кырдаалды жөнгө салуу боюнча компетенттүү мамлекеттик органдар көрүп жаткан чаралар жөнүндө маалымат берилди.
Президент Алмазбек Атамбаев жарандардын коопсуздугун, мамлекеттик чек аранын коопсуздугун камсыз кылуу боюнча коюлган милдеттерди так аткаруу тапшырмасын берди. Ошону менен катар аяр мамилени талап кылган чек ара көйгөйлөрүн конструктивдүү чечүү багытын улантуу зарылдыгын белгиледи.
