Ишемби биз үчүн жумуш күн болгондуктан, кадимкидей эле иштеп жатканбыз. Анан эртерээк кетүү тууралуу сүйлөштүк. Шылтоо катары бирөө кечирээк туруп башы ооруп жаткандыгын айтса, кай бири уйкусу канбай калганын кеп кылды. Аңгыча эле Москвадан өрт чыгып, анда мигранттар каза болду деген суук кабар келди… Алгач КМШ өлкөлөрүнүн жарандары, анан эле баары кыргыздар экен деген маалымат тарады. Ишенгим келген жок, кайра-кайра сурап жаттым, балким башкалардыр? Сураштыралычы, адашып кеткендир… Тилекке каршы, мүнөт сайын маалымат такталып, баары кыргыздар экени анык боло баштады. Ан сайын көкүрөктү кан талап, жүрөк тилинип турду. Бул көрүнүш бир гана менде эмес, бардык кесиптештеримде, бүтүндөй кыргыз журтунда болду. Анан кеч туруп башы ооруп жатканына нааразы болгондор, эрте туруп уйкусу канбай калгандар жаратканга жалбара баштады. Анткени биз ойгонуп, таңдын агарып атканын көрдүк, ал эми Москвадагы өрттөн каза болгондор…
Каргашалуу окуянын күбөсү каза болгон аял жакынкы арада Кыргызстанга кетүүгө камынып жаткандыгын, ал эми дагы бирөөсүнүн боюнда бар экендигин айтканда көздөн эмес жүрөктөн кан акты. Ошентип бул күн кыргыздар үчүн кандуу ишемби болуп кала берди.
Антип суук кабардан акыл-эсибизди жыйгыча Бишкек — Ош кан жолунда эки унаа кагышып, тогуз адамдын мерт кеткени угулду. Сегизи ошол жерден жан берсе, бирөө ооруканага баратканда көз жумуптур…
Ооба, азыр эми социалдык тармактарда же эки адамдын башы бириксе эле көрүнгөндү айыптап, күнөөлүүнү издейбиз. Күн чыкканда чырактын пайдасы жок болгон сыңары, азыр ар кимди күнөөлөөдөн майнап чыкпайт. Андыктан эсибиз барда этегибизди жыйып, кыргыздын кыраан жигиттери кыздарыбызды кайрып келели. Бизге караганда экономикасы артта делген Тажикстан, биз менен катарлаш жүргөн Өзбекстандын кыздарын Москвада дээрлик көрбөйсүң дешет. Келгиле, кеч болуп кала электе кемтигибизди бүтөп алалы.
Кудайдын буйругусуз кумурсканын буту сынбайт эмеспи. Андыктан ичээр суусу токтогондордун жакындарына Sputnik Кыргызстан агенттигинин жамааты терең кайгыруу менен көңүл айтат. Жараткан жакшы көргөн пендесин эрте алат дешет, балким алардын ары жакта кереги бардыр. Белди бекем бууп, кайгыга алдырбоого чакырабыз. Бул бир гана силердин эмес, бүтүндөй улуттун арманы! Баарыбыз каккан казыктай тик туралы.
Ал эми президент Алмазбек Атамбаев бүгүнкү күндү жалпы Кыргызстан боюнча аза күтүү күнү деп жарыялады.
Буюрса бүгүн Кыргызстанда күн ачык болуп, Бишкек шаарында абанын температурасы 30…34 градус жылуу болсо, Ошто 32…35 градус жылуу болуусу күтүлөт.
Валюта баасы. Бүгүн сомдун баасы долларга карата орто эсеп менен 68.80 (сатып алуу) жана 6894 (сатуу) сомду түздү. Мунай баасы. Бишкекте Аи-95 үлгүсүндөгү бензин 38.30 сом, Аи-92 үлгүсүндөгү май 35.20 сом, ал эми дизель майы 30 сомдон сатылууда.
Соңку сөз ордуна. Маркумдардын жаткан жери жайлуу болсун.
Кечиргиле кыргыздын кыйын кыздары, биз, жигиттер, силерди сактай албадык. Исмаил Мамытов.
