БИШКЕК, 16-авг. — Sputnik. Башкы прокуратуранын кызматкерлери тарабынан Ички иштер министрлигинин 5-башкы башкармалыгынын кызматкери менен мурдагы прокурор кармалды. Бул тууралуу Башкы прокуратуранын маалымат кызматынан кабарлашты.
Ведомствонун берген маалыматына караганда үстүбүздөгү жылдын 19-майында кызматтык мүмкүнчүлүгүн аша чаап колдонуу жана акча талап кылуу фактылары боюнча укук коргоо кызматкерлерине кылмыш иши козголгон.
Милиция кызматкери 27-майда кармалса, Башкы прокуратуранын мурдагы кызматкери 14-августта кармалды.
Прокуратура кылмыш иштин ийне-жибине чейин маалымдаган билдирме таркаткан жок. Ал эми ведомствонун маалымат кызматы кармалгандардын экөө тең соттун чечими менен камакка алынганын ырастады.
Башкы прокуратура кылмышка шектүүлөрдүн калгандарын издөө улантылып жатканын белгиледи.
