БИШКЕК, 16-авг. — Sputnik. Таңкы саат төрттө Меккеге аттангандар Бишкектеги аба майданынан учуп кетишет. Быйылкы ажылык сапарга аттана турган зыяратчылардын эң улуу аксакалдарынын бири — Каюм Юлдашев учурда 86 жашта. Меккеге аттанар алдында Sputnik Кыргызстан агенттиги Каюм атаны кепке тартты.
Баткендин Лейлек районундагы Лейлек айылынын тургуну Каюм аксакал зыяратка аттанар алдында бир кубанып, бир толкунданып тургандыгын айтты. Ал ажылыкка баруунун да өзүнүн жол-жобосу, мезгили бар экендигин кошумчалады.
"Мен ажылык сапарга көп жыл даярдандым. Жаш кезимде көкүрөккө түйгөн бир максатым эле. Ажылык — барам деп эле жөнөп кете турган сапар эмес да. Бала-чакамды үйлөп-жайлап, билимдүү кылып, аталык милдетимден кутулуп, анан ажылык вазийпамды аткарам деген максат эле. Эми Меккеге барууну Кудай насип кылды", — деди Каюм аксакал.
Бир кылымдык өмүргө саналуу жылдардан кийин кадам таштай турган Каюм аксакал өмүр бою баш көтөрбөй иштептир. Алгач Сүлүктүдөгү көмүр шахтасында шахтердун жардамчысы, заводдун жумушчусу, гредейрчи болуп иштеп, кийин көп жыл мал багыптыр.
Каюм ата зыяратка эч кимди коштотпой жалгыз эле жөнөп жатканын, бирок караан тутканга сапарлаш болгон жашы кичүүрөөк айылдаштары, тааныштары бар экенин айтты. Анткен менен өз алдынча да даярдык көрүп жатыптыр.
"Доктурлар ден соолугумду жакшы эле дешти. Ал эми бутумду, денемди көндүрүп машине менен жетчү жерлерге чакырымдап жөө барып-келип жатам. Себеби организм да бир аз кыйынчылыкка көнүшү керек", — деди зыяратчы.
Ал ажылыктын жолуна кетчү акчаны өзүнүн маңдай тери менен таап, баккан малын сатып топтоптур.
"Балдарынын колунда кудайга шүгүр оокаты бар, бирок ажылыкка өзүмдүн маңдай-терим менен тапкан акчаны жумшап бара жатам. Негизи ушундай болушу керек. Былтыр да барам деп, бирок документим туура болбой калган", — деди аксакал.
Кылымга тете жашаган аксакалдын өзүнүн ишеними бар.
"Бир күнү түшүмдө пайгамбар караңгы жерде отурсам чырак берип жатыптыр, ойгонуп кеттим. Бул да мага өзүнчө бир дем-кубат берди", — деп айтып берди Каюм аксакал.
Байбичеси Адалат апа менен Каюм ата — тогуз баланын ата-энеси, 30 небере жана 26 чеберенин чоң ата-чоң апасы.
