БИШКЕК, 15-авг. — Sputnik. Эски көрүстөндөргө курулуш жүргүзүүгө тыюу салган "Жер кодексине толуктоолорду киргизүү" боюнча мыйзам долбоору коомдук талкууга коюлду.
Мыйзам долбоордун демилгечиси — Жогорку Кенештин депутаты Ильхом Маннанов.
Мыйзамдын негиздемесинде эски көрүстөндөр маданий мурас объектилери болуп саналары, демек, мындай көрүстөндөрдүн жер тилкелери тарыхый-маданий арналыштагы жерлерге кирери жазылган.
"Мурдатан сөөк коюлуп келген, бирок кийин токтотулган жайлардын аймактарына имарат жана объектилерди курууга тыюу салуу зарыл. Анткени объектилерди куруу үчүн орун "тазалоо" максатында эски мүрзөлөр массалык түрдө жок кылынышы мүмкүн. Бул өлгөндөрдү жана алардын мүрзөлөрүн мазактоо болуп калат", — деп айтылат негиздемеде.
Сунушталып жаткан мыйзам боюнча жарандар туугандарынын жана жакындарынын мүрзөлөрүн узак жылдар бою карап-күтүүгө укуктуу болот.
Мыйзам долбоору эски көрүстөндөрдүн маданий мурас объект катары статусун мыйзамдык негизде бекемдөөгө, алардын жер тилкелерин тарыхый-маданий арналыштагы жерлерге киргизүүгө багытталып, аны жеке менчикке берүүгө тыюу салат.
