БИШКЕК, 11-авг. — Sputnik. Бишкекте биринчи дүйнөлүк Кыргызстан жаштар курултайынын ачылышы болуп өттү. Бул тууралуу "Саякбай манасчы" эл аралык коомдук фонду билдирди.
Беш күнгө созула турган курултайдын ачылыш салтанаты Токтогул Сатылганов атындагы улуттук филармонияда болуп, ага депутат Садык Шер-Нияз, КРдин Алматыдагы консулу Алиясбек Алымкулов, Маданият, маалымат жана туризм министринин милдетин аткаруучу Түгөлбай Казаков, "Саякбай манасчы" эл аралык коомдук фондусунун негиздөөчүсү Самат Ибраевдер катышты.
"Мен Кытайга барып, Кыргызстандагы жетим-жесирлерге жардам берген кыргыз студенттерин көрүп, абдан таасирленгем. Анан ошол жигиттер менен чогуу Кытайдагы кыргыздардын курултайын өткөргөнбүз. Бүгүн болсо эл аралык деңгээлге чыгып, дүйнөлүк Кыргызстан жаштарынын курултайын өткөрүп жатабыз. Бул чоң жетишкендик. Биздин максат — өлкөбүздү өнүктүрүү менен элдин биримдигин арттыруу", — деди Ибраев.
Иш-чара концерттик программа менен коштолду.
Белгилей кетсек, курултай эми Ысык-Көл жергесинде уланат.
Бүткүл дүйнөлүк жаштар курултайы спорт, илим, маданият, бизнес жаатындагы жаш лидерлердин башын бириктирип, бир канча долбоорлорду ишке ашырууга багытталат.
