БИШКЕК, 9-авг. — Sputnik. АКШнын окумуштуулары изилдөө учурунда жалкоо адамдардын интеллектиси жогору болорун далилдешкендиги тууралуу The Independent агенттигине шилтеме берүү менен РИА Новости жазып чыкты.
Флорида университетинин изилдөөчүлөрү 60 студентти жыйнап, аларды эки топко бөлүшкөн. Бардыгына бирдей тапшырмалар берилгенде 30 адам көнүгүүлөрдү канааттануу менен аткарып, көйгөйлөрдү чечүүнүн жаңы жолдорун издеп жатышканын билдирген. Ал эми экинчи топтогу 30 адам маселелер үстүндө муктаж маалда гана ойлонушарын билдиришкен.
Мындай тажрыйбадан кийин окумуштуулар көп ойлонбогон адамдар бат зеригип, бош убактысын физикалык активдүүлүккө жумшайт деген бүтүмгө келишкен. Ал эми жалкоолук ойго чөмүлгөн адамдарда пайда болору аныкталды. Бирок буга карабастан окумуштуулар жогорку интеллект жашоонун аз кыймылдуу образына шылтоо болбошу керек экенин белгилешет.
