БИШКЕК, 6-авг. — Sputnik. Бразилия полициясы Олимпиада оюндарына катышуу үчүн келген марокколук мушкер Хассан Саадды спортчу жайгашкан бөлмөнү тазалаган эки аялга асылганы үчүн камакка алды. Бул тууралуу Би-Би-Си каналына таянуу менен РИА Новости билдирди.
Полициянын маалыматы боюнча, кол салуу шаршемби күнү болгон. 22 жаштагы Саад аялдын бирин дубалга такап, өбүүгө аракет кылган. Мындан тышкары, экинчи аялдын төшүнөн кармады деп айыпталууда.
Бразилиялык сот Ларисса Нунес Сали Саадды 15 күнгө камакка алуу чечимин чыгарган. Бул кадам териштирүү маалында спортчу кайрадан мыйзам бузуп, же Бразилиядан чыгып кетет деген кооптонуудан улам жасалганы түшүндүрүлдү.
Оор салмак категориясында күч сынаша турган марокколук мушкер алгачкы беттешүүсүн ишемби күнү өткөрүш керек болчу. Эми камактан улам мелдешке катышуу мүмкүнчүлүгүнөн ажырады.
