БИШКЕК, 30-июл. — Sputnik. Лондондун соту британиялык ишкер Шон Дейлинин КРдин мурдагы президенти Курманбек Бакиевдин уулу Максим Бакиевдин үстүнөн берген доо арызын канааттандырган жок. Бул тууралуу Британиянын Oxford Mail басылмасы билдирди.
Аталган бизнесмен 2006-жылы Кыргызстандагы британиялык алтын казган Oxus Gold компаниясында юрист болуп иштеп турганда Максим Бакиевди аны өлтүрүүгө аракет кылган деп айыптап сотко берген.
Басылманын маалыматына ылайык, сот Шон Дейлинин көрсөтмөлөрүн жетишсиз деп таап, анын доосун канааттандырган эмес.
Ал эми Кыргызстанда Бишкектин Биринчи Май райондук соту 2014-жылы мурунку президент Курманбек Бакиев менен анын үй-бүлө мүчөлөрүн — Жаныбек (Жаныш) Бакиев, уулдары Марат жана Максим Бакиевди кен казуучу Oxus Gold компаниясынын өкүлү, АКШ жараны Шон Дейлини өлтүрүүгө аракет кылган деп айып койгон. Мындан улам мурунку өлкө башчы 25 жылга кесилсе, Улуттук коопсуздук кызматынын ошол кездеги жетекчиси Жаныш Бакиев менен Максим Бакиев мүлкүн конфискациялоо менен өмүр бою эркинен ажыратылган. Ал эми УКК төрагасынын ошол кездеги орун басары Марат Бакиев 20 жылга кесилген.
