БИШКЕК, 26-июл. — Sputnik. Юстиция министрлиги чет жерден келген жарандарды сөзсүз түрдө биометрикалык маалымат тапшырууга милдеттендирүү сунушун берип жатат.
"Кыргызстандын жарандарынын биометрикалык маалыматтарын каттоо" тууралуу мыйзамга өзгөртүү киргизүү боюнча долбоор коомдук талкууга коюлду.
Мыйзам долбоордун негиздемесинде Кыргызстандын аймагында жүргөн бардык чет элдик жарандардын маалымат базасын түзүү керектиги жазылган.
"Бул мыйзам долбоордун негизги максаты кылмыштуулук, мыйзамсыз миграция, терроризм жана адам сатуу менен күрөшүүгө багытталган. Көпчүлүк учурда кылмышкерлердин колунан чет элдик жарандар жабыркаган учурлар кездешет. Бирок чет элдиктердин арасынан дагы кылмышкерлер чыкпай койгон жок", — деп айтылат маалыматта.
Документте Кыргызстандын аймагында үч айдан жогору убакыт жүргөн бардык чет элдиктерди биометрикалык каттоодон өтүүгө милдеттендирүү сунушу көрсөтүлгөн. Бул чет жерден келгендердин санын тактоого шарт түзөөрүнө мыйзам долбоордун авторлору ишенишет.
