БИШКЕК, 7-июл. — Sputnik. Премьер-министр Сооронбай Жээнбеков КРдин Өзбекстандагы элчиси Данияр Сыдыковду кабыл алып, мамлекеттик чек араларды делимитациялоо жана демаркациялоо боюнча өкмөт аралык комиссиянын кезектеги жыйынын өткөрүү зарылдыгын айтты. Бул туурасында өкмөт башчынын маалымат кызматы кабарлады.
Премьер жаңы элчи өзүнүн иш тажрыйбасын келечекте Өзбекстан менен мамилелерди мындан ары да өнүктүрүүгө жумшаарына ишеним билдирип, андан сырткары Атамбаев менен Каримовдун жакынкы жолугушуусун эске салды.
"Жээнбеков президент Алмазбек Атамбаев жана Өзбекстан башчысы Ислам Каримовдун 24-июнда болгон Ташкенттеги жолугушуусун эске алуу менен Өзбекстан менен бардык маанилүү багыттарда кызматташууну активдештирүү, коңшулук алаканы чыңдоо зарылдыгын белгиледи", — деп айтылат маалыматта.
Өкмөт башчы Кыргызстан менен Өзбекстандын ортосундагы эки тараптуу кызматташуу боюнча биргелешкен өкмөт аралык комиссиянын, ошондой эле эки тараптын мамлекеттик чек араларды делимитациялоо жана демаркациялоо боюнча өкмөт аралык комиссиянын кезектеги жыйынын өткөрүү зарылдыгын белгиледи.
