БИШКЕК, 1-июл. — Sputnik. Жалпы республикалык тестирлөөнүн жыйынтыгында эң жогорку балл алган 66 бүтүрүүчүгө өлкө башчысы Алмазбек Атамбаев алтын сертификаттарды тапшырып, аны менен кошо акчалай сыйлык жана планшет ыйгарды.
Өлкө башчы өз сөзүндө Кыргызстандын бюджетинин 20 пайызы билим берүүгө жумшаларын айтты. Президент бүтүрүүчүлөрдү алгачкы ийгилиги менен куттуктап, билим алууга канчалык көп убакыт бөлүнсө, анын акыбети ошончо кайтарына токтолду.
"Бул силердин турмуш жолуңардагы алгачкы жеңишиңер. Билим алууга канчалык көп убакыт бөлсөңөр, анын акыбети ошончо күчтүү жана жакшы болот. Кыргызстан Евразия аймагынан ЖРТны биринчилерден болуп киргизген. Билим берүүгө бюджеттин 20 пайызы жумшалат. Өзүнүн бюджетинин 20 пайызын билим берүүгө жумшаган бир да мамлекет жок. Албетте биздин бюджет чакан, ошентсе да анын көлөмү жыл сайын артып жатат", — деди ал.
Атамбаев алдыдагы жылдары Кыргызстанда тоо кен, энергетика, туризм, жеңил өнөр жай жана айыл чарба адистерине муктаждык көп боло турганын айтып, бул тармактарга жогорку билимдүү адистер керек экенин кошумчалады.
