БИШКЕК, 14-июн. — Sputnik. Быйыл Баткен облусунда өрүктүн жана гиластын (черешня) баасы бир кыйла түшүп, учурда өрүк 20 сомдон, гилас 60-70 сомдон сатылып жатканын Баткен шаарынын борбордук базарында соода кылган Ырысбү Ибраева билдирди.
Анын айтымында, былтыр өрүктүн баасы 100-120 сомго чейин көтөрүлгөн.
"Өрүктөр жаңы бышкан кезде 60 сомго чейин саттык. Азыр бардык жакта өрүктөр бышкандыктан алардын эң жакшылары 25 сомдон, калгандарын 20 сомдон сатып жатабыз. Гиласты да 60-70 сомдон сатуудабыз. Анын деле убагы бүтүп калды. Былтыр аны 130га чейин саттык эле", — дейт ал.
Ибраева дыйкандар өстүргөн өрүгүн бузулуп жок болуп кетпесин деп атайын келген фураларга арзан эле өткөрүп жатканын айтат.
Сатуучу күн ысык болгондуктан сары өрүктүн алды бышып калганын баса белгиледи.
Ал эми өкмөттүн Баткен облусундагы ыйгарымдуу өкүлү Жеңиш Разаков өрүктүн баасы түшүп жатканын быйыл анын көп болгону менен түшүндүрүп, чет мамлекетке да сатылып жатканын айтты.
"Азыр абрикос — ак өрүк бышып ал Россияга, коңшу Тажикстан мамлекетине да сатылып жатат. Ак өрүктү чет жакка сатуу боюнча алармандар менен сатуучуларга шарт түзгөнбүз", — дейт Разаков.
Ушундай эле көрүнүш Жалал-Абад облусунда да байкалат. Быйыл жаан көп жаап, күн ысык болгондуктан өрүктөр жакшы чыкканын жергиликтүү тургун Максат Бакиров айтат.
"Жазында үшүк жүрдү дегени менен өрүктөрдү үшүк албаптыр. Күн да ысык болуп, жаан да мол жаады. Азыр өрүк төгүлүп эле бышып жатат. Базарда 20 сомдон 40 сомго чейин сатылууда. Былтыр өрүктү үшүк алып кеткендиктен түшүм аз болуп, анын килограммы базарда 100 сомго чейин сатылган", — дейт жергиликтүү тургун.
Эскерте кетсек, март айында Жалал-Абад облусуна кар жаап жаңы гүлдөгөн мөмө бактарды үшүк алган делинген болчу.
Бакиров андан сырткары азыр Жалал-Абад шаарынын базарында облустун аймагында бышкан гана өрүктөр сатылып жатканын, башка аймактардын өрүктөрү келе электигин кошумчалады.
