БИШКЕК, 13-июн. — Sputnik. Казакстан 4-июндан тартып Кыргызстандан картошкасын өз өлкөсүнө киргизүүсүнө уруксат берди. Бул тууралуу Новости – Казахстан маалымат агенттиги билдирди.
Казакстандын Айыл чарба министрлиги 4-май күнү Кыргызстандан картошка алууга убактылуу тыюу салган. Казак бийлиги муну акыркы кезде Кыргызстандан барган картошкадан ылаң табылып жатканы менен негиздеген. Бул маселе бир нече ирет ар кандай деңгээлде көтөрүлгөн. ЕАЭБ мамлекет башчыларынын жыйынында бул маселени президент Алмазбек Атамбаев да козгогон.
"Түшкөн билдирүүгө ылайык, адистер кырдаал менен жеринен таанышып келди. Андан соң 4-июнь күнү чектөө алынды. Бүгүнкү күндө Казакстанга картошка алып келсе болот. Абал көзөмөлдөнүп жатат", — деп айтылат маалыматта.
Казакстандын Айыл чарба министрлигинин маалыматы боюнча үстүбүздөгү жылдын январь айынан баштап ууланган картошка киргизилген 79 учур катталган. Мындан улам Кыргызстанга жараксыз делген продукциянын 1000ден ашуун тоннасы кайтарылган. Андан сырткары, ууланган картошка айдоо иштери үчүн пайдаланылышы мүмкүн деген кооптуулук күчөгөн.
