БИШКЕК, 11-июн. — Sputnik. Үстүбүздөгү жылдын 14-16-июнь күндөрү Түркмөнстанда Кыргызстандын маданият күндөрү өтө турганын Маданият, маалымат жана туризм министрлиги билдирди.
Мында түркмөн элине маданият жана искусство чеберлеринин өнөрү тартууланып, тасмалар көрсөтүлүп, көргөзмөлөр уюштурулат.
"Иш-чаранын салтанаттуу ачылышы 14-июнда Түркмөнстандын мамлекеттик маданият борборунда өтөт", — деп айтылат билдирүүдө.
15-июнда Түркмөнстандын көркөм сүрөт музейинде кыргыз кол өнөрчүлөрүнүн буюмдары көрсөтүлүп, туристтик жармаңке уюштурулат. Ушул эле күнү "Ашхабад" кинотеатрында "Кызыл алма" жана "Курманжан датка" тасмалары тартууланып, ири концерт менен коштолот.
Иш-чара 16-июнь күнү Төлөмүш Океевдин "Бакайдын жайыты" тасмасы жана ири программадагы гала-концерт менен жыйынтыкталат.
