БИШКЕК, 10-июн. — Sputnik. Беш жашар баланы уурдап келип, оозун скотч менен таңып, колу-бутун байлап үйдөгу ороого катып койгон аял кармалды. Бул тууралуу Нарын ОИИБдин маалымат кызматы билдирди.
Маалыматка ылайык, Нарын шаарынын 61 жаштагы тургуну милицияга кайрылып, 2011-жылы туулган небересин үйүнүн эшигинин алдында ойноп жаткан мезгилде уурдап кетишкенин билдирген.
"Өзүнүн көрсөтмөсүндө айым анын небересин көчөдө ойноп жаткан жеринен белгисиз адам алдоо жолу менен "эжең чакырып жатат" деп шылтоолоп чоң жол жакка чыгарып уурдап кеткен. Баланын туугандары артынан барып издегенде аны 1986-жылы туулган Нарын шаарынын тургуну Т.К. аттуу айым өзүнүн үйүнө алып кеткенин билишкен", — деп айтылат маалыматта.
Учурда шектүү аял убактылуу кармоо жайына киргизилип, тергөө амалдары жүрүүдө.
Ал эми бала уурдоого эмне түрткү болгону азырынча тактала элек.
