Кыргыз илимпоздору Чыңгыз Айтматовду эскеришти

БИШКЕК, 10-июн. — Sputnik. Улуу жазуучу Чыңгыз Айтматовду бүгүн Улуттук илимдер академиясында илимпоздор эскерип, атайын тегерек стол өттү. 

Аталган иш-чарага КР президентинин аппаратынын өкүлү, илимпоздор, окуу жайларынын окутуучулары, коомдук ишмерлер, акын-жазуучулар, искусство тармагынын өкүлдөрү келишти. 

Иш-чарага катышкан президенттик аппараттын этникалык, дин саясаты жана жарандык коом менен аракеттешүү бөлүмүнүн эксперти Заирбек Эргешов Айтматовдун адамзаттын руханий жашоосундагы ролун баса белгиледи.

"Быйыл "Тарых жана маданият" жылында өзүбүздүн тарыхыбызга, маданиятыбызга тилибизге басым койбосок, үңүлө изилдебесек, анда биздин өнүгүү бүдөмүк жана туман бойдон калат. Өнүгүү жолубузду Япониядан, Швейцариядан же болбосо Араб өлкөлөрдөн издегенди токтотушубуз керек. Биздин түпкүрүбүз, негизги багытыбыз – кыргыздын тарыхы, маданияты жана рухий дөөлөтү", — деп баса белгиледи. 

УИАнын вице-президенти Алтай Бөрүбаев Айтматовдун улуу ойчулдугу, элинин эле эмес, адамзаттын жан дүйнөсүндө боло турган терс көрүнүштөрдү көрө билгендигин баса белгиледи.

Тегерек столдо Айтматовго жана анын чыгармаларына арналган даректүү тасма көрсөтүлдү.