БИШКЕК, 31-май — Sputnik. Ирактын аскер аба күчтөрү ракеталык бомбалоодон кийин "Ислам мамлекети" террордук уюмунун жети лидерин жок кылды. Бул туурасында РИА Новости кабарлады.
Бомбалоо Анбар провинциясында, Сирия мамлекети менен чектешкен жерде болгон. Жок кылынгандардын арасында "Ислам мамлекетинин" лидери Абу Бакр аль-Багдадинин жакын жардамчылары, Ирак менен Сириядагы ири отряддарынын башчылары жана Ефрат провинциясындагы шариаттык сотунун жетекчиси болгон.
Буга чейин, кечээ ирак аскерлери бошотуу операциясынын негизинде Эль-Фаллужа шаарына киргендиги кабарланган.
Согушкерлерди камалоо алдында Ирак аскерлери радикалдардын шаардагы лидери Хажи Хамзаны жок кылган.
"Мындан сырткары, "Ислам мамлекетинин" командири Абу Амир Аль-Ансари өлүп, анын жардамчылары жарадар болду", — деп айтылат бюро тараткан маалыматта.
"Ислам мамлекети" террордук уюму Эль-Фаллужа шаарын 2014-жылдан тарта кармап турган.
