БИШКЕК, 26-май — Sputnik. Өлкө мектептеринин окуучуларынын арасында жыл сайын өтүүчү спартакиадада Бишкек, Чүй жана Көлдүн окуучулары жеңишке ээ болду. Бул туурасында мэриянын маалымат кызматы кабарлады.
Таймаштар спорттун 15 түрү — баскетбол, волейбол, тогуз коргоол, стол тенниси, шахмат, мини-футбол, эркин жана грек-рим күрөштөрү, кадимки күрөш, бокс, ордо, жеңил жана оор атлетика, самбо, таэквондо боюнча өттү.
Спорттук таймаштарга жалпы билим берүү мектептер менен гимназияларда билим алган, 18 жаштан ылдыйкы курактагы улан-кыздар катышты.
Спартакиаданын жыйынтыгы менен биринчи орунду Бишкек шаарынын командасы жеңип алды. Экинчи орунга Чүй облусунун, ал эми үчүнчү орунга Ысык-Көл облусунун командалары ээледи. Жеңүүчүлөр Бишкек шаарынын дене тарбия жана спорт Башкармалыгынын кубоктору, медалдары, дипломдору жана баалуу сыйлыктар менен сыйланды.
