БИШКЕК, 18-май — Sputnik. Үркүндүн 100 жылдыгына карата мемориал куруу боюнча архитектор менен скульпторлордун ортосунда жарыяланган сынактын катышуучуларына президент өз фондусунан акчалай сыйлык бөлүп берди. Бул тууралуу Маданият, маалымат жана туризм министрлигинин басма сөз катчысы Кундуз Качкынбаева билдирди.
Сынакка катышып жаткан 13 архитектор менен скульпторго 10 миң, 15 миң жана 20 миң сомдук сертификаттарды маданият, маалымат жана туризм министри Алтынбек Максутов тапшырды.
Эскерте кетсек, аталган сынак министрлик тарабынан жарыяланып, эскиздерди кабыл алуу үстүбүздөгү жылдын 1-августуна чейин жүрөт.
Долбоордо башкы пландын схемасы, комплекстин макети, кошумча графикалык материалдар, композициянын айрым үзүндүлөрү камтылышы шарт. Сунушталган иштерди комиссия тандайт. Бардык эмгектер Гапар Айтиев атындагы мамлекеттик көркөм сүрөт музейинде кабыл алынат.
