Бүгүн, 14-май күнү президент Алмазбек Атамбаев "Ала-Арча" мамлекеттик резиденциясында "Баатыр эне" орденин ыйгарды. Бул иш-чара Кыргызстандагы Энелер күнүнө карата өткөрүлдү.
Өз сөзүндө өлкө башчы энелерди куттуктап, өлкөдөгү саясий абалга кеңири токтолду. Президент акыркы убакта кырдаалдан курчутууга аракеттер көрүлүп жатканын айтып, чет элдин акчасына сугарылган Элдик парламенттин мүчөлөрү Кыргызстандын келечегин ойлобостон кан төгүп болсо дагы бийликти басып алууну көздөп жатканын белгиледи.
"17-майда төңкөрүш жасап, бийликти алмаштырабыз деп жатышат. Алардын айтымында, бул үчүн жүздөгөн жоокер келип, курал менен камсыздалышкан. Жакпаган, аларга каршы чыккан адамдардын көзүн тазалайбыз деп жатышат. Алар ачык эле артында башка мамлекеттердин атайын кызматтарынын генералдары турганын, чет өлкөдөн акча келгенин айтып мактанып жатышканын баарыбыз уктук", — деди Атамбаев.
Президент өлкөдөгү абалды курчутууга жасалган аракеттерге кескин чаралар көрүлөрүн белгиледи.
