БИШКЕК, 11-май — Sputnik. Кыргызстандын Жарандык коргонуу боюнча эл аралык уюмунун (ЖКЭУ) Аткаруу комитетинин курамына киргизилиши — өлкөнүн жарандык коргонуу тутумундагы маанилүү ордунун таанылышы. Бул тууралуу премьер-министр Сооронбай Жээнбеков бүгүн аталган кеңештин 49-сессиясынын ачылышында билдирди.
Өкмөт башчы бул ирет алгачкы жолу Жарандык коргонуу боюнча эл аралык уюмунун иш-чарасы өз штаб-квартирасынан тышкаркы аймакта өтүп жатканын белгиледи. Анын айтымында, 2012-жылдан тарта ар жыл сайын Кыргызстан аймагында аталган уюм менен тыгыз кызматташтыкта уюмга мүчө өлкөлөр үчүн тоодо куткаруу жана суучулдар үчүн эл аралык даярдык курстары өткөрүлүп келет.
"Кыргызстан үчүн бул маселе абдан актуалдуу. Өткөн жылы эле республиканын аймагында 200 ашуун ири өзгөчө кырдаал орун алды, материалдык зыяндын көлөмү он миллиондогон АКШ долларына бааланат", — деди ал.
Жээнбеков бул уюм жарандык коргонуу жаатында абройлуу эл аралык түзүм болуп саналарына токтолду.
"Кыргызстандын Жарандык коргонуу боюнча эл аралык уюмунун Аткаруу комитетинин курамына киргизилиши — өлкөнүн эл аралык жарандык коргонуу тутумундагы маанилүү ордунун таанылышы катары кабыл алынат", — деди премьер-министр.
Кыргызстан 2014-жылы ЖКЭУ Башкы Ассамблеясынын 21-сессиясында аталган уюмдун Аткаруу комитетинин курамына киргизилген.
