БИШКЕК, 10-май — Sputnik. "Альфа Телеком" ЖАК (MegaСom) 100 пайыз акция пакетин сатуу боюнча аукцион болбой калды. Бул тууралуу Sputnik Кыргызстан агенттигине Жогорку кеңештин депутаты, компания менчиктештирүү боюнча комиссиянын мүчөсү Сайдулла Нышанов билдирди.
MegaСom компаниясы сатыкка февраль айында коюлган. Өкмөт мындай чечимин компанияны мындан ары өнүктүрүүгө чама-чаркы чак келбей турганы менен түшүндүргөн.
Аукцион 4-майга белгиленип, эс алуу күндөргө туш келгендиктен 11-майга которулган. Мындан улам арыздарды кабыл алуу бүгүн саат 10.00дө аяктап, эртең жыйынтыгы чыкмак.
"Бир да арыз келип түшкөн жок. Мындан улам аукцион болбой калды", — деди Нышанов.
Анын айтымында, Интернет күчөп турган заманда уюлдук оператор үчүн 300 миллион сомдук баа өтө эле кымбат болуп саналат.
"Альфа Телеком" ЖАК 2009-жылы түзүлүп, жалгыз ээси Алексей Елисеев болгон. Убактылуу өкмөт 2010-жылы компаниянын 49 пайыз акциясын улутташтырып, 51 пайызы Елисеевге караштуу Southfield Management Inc. жана Vesatel Unitеd Limited компаниясынын менчигинде калган. Өткөн жылдын июль айында акциянын 51 пайызына салынган сот бөгөтү алынып, мамлекет акциянын 100 пайызына ээлик кылып калган.
