БИШКЕК, 10-май — Sputnik. Бишкектин "Дордой" жаңы конушундагы мектепти курууда мыйзам бузуулар аныкталды. Бул тууралуу Башкы прокуратура билдирди.
Маалыматка ылайык, 2012-жылдын сентябрь айында шаардык мэриянын капиталдык курулуш башкармалыгы "А-С" ишканасы менен "Дордой" жаңы конушундагы, 200 миллион 703 миң сомго бааланган мектеп курууга келишим түзгөн.
Эсептөө палатасынын жүргүзгөн аудитинин жыйынтыгы боюнча мектепти курууга макулдук алган компания тарабынан жасалган иш 19 миллион 643 миң 300 сомго ашыкча бааланып, мамлекетке ири өлчөмдө материалдык зыян келтирилгени аныкталган.
Аталган факт боюнча Башкы прокуратура тарабынан Кылмыш жаза кодексинин 304-беренеси (кызматынан кыянаттык менен пайдалануу) жана 166-беренесинин (алдамчылык) негизинде кылмыш иши козголду.
