БИШКЕК, 5-май — Sputnik. Мail.ru менен gmail почталарынын колдонуучуларына тез арада сыр сөздөрүн өзгөртүү сунушталат. Бул тууралуу Sputnik Кыргызстан агенттигине IT адис Кубаныч Жумабек уулу билдирди.
Шаршемби күнү Hold Security коопсуздугунун ага адиси Алекс Холден миллиондогон почта аккаунттары хакерлер тарабынан бузулганын айткан.
Мындан сырткары, 40 миллион Yahoo, 33 миллион Microsoft Hotmail жана 24 миллион Google почталары бузулуу коркунучунда калган. Миңдеген уурдалган паролдор эң ири америкалык банктардын, ишканалар менен компаниялардын кызматкерлерине таандык болуп чыкты.
Адистин айтымында, почта кызматтарын бузуу оңой иш эмес, ошентсе да кооптуулук бар.
"Почтадагы маалыматтарды сактап калуу үчүн паролдорду өзгөртүп салуу сунушталат. Бул толук коопсуздукка кепилдик бере албайт, бирок жеке маалыматтар менен сүрөттөр башка порталдарга жарыяланып кетпеши үчүн паролду өзгөртүп коюу туура болот", — деп билдирет адис.
Буга чейин Mail.ru кызматынын өкүлү коопсуздук жаатында иштер жүрүп жатканын билдирген.
Ал толук маалыматтар алынгандан кийин хакерлердин курмандыгы болуп кала жаздаган колдонуучуларга кабар берилерин кошумчалаган.
