БИШКЕК, 30-апр. — Sputnik. Өлкө башчысы Алмазбек Атамбаев кыргызстандыктарды 1-май — Эмгек майрамы менен куттуктады. Бул тууралуу президенттин маалымат кызматы билдирди.
Президенттин куттуктоосунда Май, Тынчтык, Эмгек деген сөздөр бири-биринен ажырагыс ыйык түшүнүк катары кабылданып калганы айтылат.
"Чынында эле бул күн – ар бир адамдын тынч, жаратман эмгегинин, бакубатчылыктын символу. Өлкө байлыгы ар бир адамдын адал эмгегинен келип жыйналат. Ар бирибиз өз үйүбүзгө, айылыбыз менен шаарыбызга мээнетибизди төксөк, бүт мамлекетибиздин кубаты артат, калкыбыздын кырманы кызылга, дасторкону ырыскыга толот", — деп жазылат куттуктоодо.
Ошондой эле 1-май – жалаң гана Эмгек майрамы болбостон, биримдиктин, ынтымак менен достуктун да символу экени айтылат. Президент куттуктоосунда ынтымакты, биримдикти көздүн карегиндей сактоо керектигин баса белгилеген.
