БИШКЕК, 28-апр. — Sputnik. Республика боюнча жер көчкү кооптуулугу сакталган жерлерде дагы 2952 үй-бүлө жашап жатканын ӨКМ маалымдады.
Аталган министрлик республиканын аймактарындагы жер көчкү жүрүүсү мүмкүн делген жерде жашап жаткан 4016 үй-бүлөнү аныктаган.
"Алардын ичинен 1064 үй-бүлө коопсуз жайларга көчүрүлүп, чыгарылган. Ал эми дагы 2952 үй бүлө бүгүнкү күндө ӨКМ адистеринин атайын-эскертмелерине көңүл бурбай, кооптуу аймактарда өз өмүрлөрүн тобокелге салып, жашап жатышат", — деп билдирди маалымат кызматы.
ӨКМ быйылкы жылы жер титирөөлөрдүн кайра-кайра кайталанып жатышына жана жаан-чачындын көп болгондугунан улам жер көчкүлөрдүн активдешүүсүн эскертти.
"Адистер кооптуу жай катары аныктаган жерлерде жашоо өтө кооптуу экендигин билдирет. Андыктан тез арада коопсуз жайларга чыгып кетүү зарыл", — деп айтылат маалыматта.
Акыркы учурларда республикада күндүн жылышы менен жер көчкү коркунучу күч алды. 27-апрелде саат 17:50 чамасында Сузак районундагы Алмалуу-Булак айылында жер көчкү жүрүп, бир окуучуну басып калган. Учурда жер көчкүнүн алдында калган 2000-жылкы Урматбек уулу Эрланды издөө иштери жүргүзүлүп жатат.
Бүгүн саат 11.00дө Сузакта дагы 2,5 миллион куб метрлик жер көчүп, бир автоунааны басып калганы белгилүү болду.
