БИШКЕК, 28-апр. — Sputnik. Жалал-Абад облусунун Сузак районундагы Кызыл-Туу айыл аймагынын Үч-Чат жайлоосунда бүгүн саат 11:00 чамасында алдын ала маалымат боюнча 2,5 миллион куб метр жер көчкү жүрүп, бир жеңил автоунааны басып калган. Бул тууралуу ӨКМ билдирди.
Маалыматка ылайык, жаратылыш кырсыгынан жабыркагандар катталган жок, учурда тактоо иштери жүрүп жатат.
Белгилей кетсек, 27-апрелде Сузак районунун Баш аймагынан жер көчкү жүрүп 16 жаштагы баланы басып калган. Андан сырткары, бир нече үй жабыркаган.
"Кызыл-Туу айыл аймагында 1994-жылдан 2015-жылга чейин кооптуу аймакта жашап жаткан 76 үй-бүлөнү көчүрүү боюнча ӨКМдин Жалал-Абад облусунун башкармалыгынын жана министрликтин өзгөчө кырдаалдарды божомолдоо жана мониторинг департаментинин адистери тарабынан тийиштүү жумуштар алып барылууда", — деп айтылат ӨКМ тараткан билдирүүдө.
2016-жылдын февраль, март жана апрель айларында эле аталган кооптуу участкалардан көчүп кетүү боюнча 18 жолу атайын-эскертмелер жергиликтүү бийликтерге берилгенин министрлик баса белгилейт.
