БИШКЕК, 28-апр. — Sputnik. Россия Афганистанды террорчулардан куткаруу боюнча Кабул менен конструктивдүү кызматташууга даяр. Бул туурасында РФ Тышкы иштер министри Сергей Лавров Азиядагы өз ара иштешүү жана ишеним боюнча өткөн жыйында айтты.
Ал Афганистанда "Ислам мамлекети" террордук уюмуна таасирленгендер менен тарапташтарынын өсүп бара жатышы кооптондура турган көрүнүш экенин белгиледи.
"Бул ансыз деле жөнөкөй эмес болуп турган абалды татаалдатат. Биз Кабулга Афганистандын кызыкчылыгы үчүн коопсуздукту камсыздоо максатында конструктивдүү кызматташууну сунуштайбыз. Аталган өлкө террорчулук жана баңги кооптуулугунан жабыр тартып келе жатат. Афган багыты боюнча жөнгө салууда Шанхай кызматташтык уюмунун орду маанилүү",— деди Лавров.
Акыркы айларда Афганистанда абал бир топ курчуп кетти. "Талибан" радикалдык кыймылы мурдатан өлкөнүн айыл жерлерин басып алган болсо, эми ири шаарларды өзүнө карата баштады. Андан сырткары, "Ислам мамлекети" террордук уюмунун да таасири күч алууда деп айтылат маалыматта.
