БИШКЕК, 28-апр. — Sputnik. Жер көчкү басып калган турак жай ээлерине 1994-жылы ссуда жана жер тилкелери берилген. Бул тууралуу Өзгөчө кырдаалдар министрлигинин маалымат кызматы билдирди.
Ага ылайык, ссуданы жана жер тилкени жети бүлө — Абдивали Табалдиев, Жолборсбек Мондоев, Сагын Тайлаков, Бакыт Ботобаев, Жумакан Козубаева, Сапаргүл Мондоевалар алышкан.
Мындан сырткары, Сузак районунун Кызыл-Туу айыл аймагынын 1994-2015-жылга чейин кооптуу аймакта жашап жаткан 76 үй-бүлөнү көчүрүү иштери жүргөн.
Өзгөчө кырдаалдарды божомолдоо жана мониторинг департаменти тарабынан 2016-жылдын февраль жана апрель айларында атайын эскертмелер тынымсыз жергиликтүү бийликтерге берилип келген.
Өзгөчө кырдаалдар министринин орун басары Равшанбек Рысбаев, ӨКМнын Жалал-Абад облустук башкармалыгынын башчысы, майор Сонунбек Отомбаевдин жетекчилигинде ыкчам топ жана Сузак райондук жарандык коргонуу комиссиясы жеринде тактоо иштерин жүргүзүшүүдө.
Эскерте кетсек, 27-апрелде саат 17:50 чамасында Сузак районундагы Алмалуу-Булак айылында жер көчкү жүрүп, бир окуучуну басып калган. Учурда жер көчкүнүн алдында калган 2000-жылкы Урматбек уулу Эрланды издөө иштери жүргүзүлүп жатат. ӨКМнин маалыматы боюнча, апасы Гүлжамал Салибаева Россияда. Эрлан жездеси Сагын Тайлаковдун үйүндө жашап келген.
Буга чейин 24-апрелде ошол эле Алмалуу-Булак айылындагы Үч-Чат тилкесинде көлөмү 1 миллион 200 миң куб метр жер көчкү жүрүп, 73 турак үйгө коркунуч жараткан.
