БИШКЕК, 27-апр. — Sputnik. Артынан Кайгуул милициясы кууган Volkswagen Touareg унаасынын айдоочусу кармала электигин Бишкек ШИИБ билдирди.
Шейшемби күнү саат 11.00дө Кайгуул милиция башкармалыгынын кызматтык унаасы "Аламүдүн-1" кичи районунан Volkswagen Touareg машинасын кууп келе жатып, атайын үн белгилерин күйгүзүп келе жаткан милиция унаасын өткөрбөй койгон Volkswagen Passat менен кагышып кеткен.
Маалыматта жол тандабастын айдоочусу жол инспекторунун буйругуна токтобой койгону айтылат. Мындан улам рация аркылуу аталган унааны токтотуу боюнча маалымат таратылган.
Кырсыктан жабыркаган Volkswagen Passat автосунун айдоочусу менен үч милиция кызматкери Бишкектеги травматология жана ортопедия илим изилдөө борборуна жаткырылды. Алардын абалы канааттандырарлык экени айтылууда.
Бишкек шаары жана Чүй облусу боюнча "Перехват" планы жарыяланды.
