БИШКЕК, 26-апр. — Sputnik. Бишкек шаардык ички иштер башкармалыгы Кайгуул милициясы кабылган жол кырсыгы тууралуу маалымат таратты.
Бишкек ШИИБнин маалымат кызматы Кайгуул милиция кызматкерлери мыйзам бузган Volkswagen Touareg унаасынын артынан куугунга түшүп, башка унаа менен кагышып алганын ырастады.
"Кайгуул милиция кызматкерлерине Volkswagen Touareg (B 0855 AR номерлүү) үлгүсүндөгү унаа баш бербей кеткендиги тууралуу рациядан кабар келген. Экипаж аталган унааны көрүп, токтотууга аракет кылган. Ал учурда аталган унаа алардан качууга аракет кылган. Анын артынан түшкөн милиционерлер Чолпон-Ата көчөсүнө жеткенде Volkswagen Passat унаасы менен кагышкан", — деп айтылат маалыматта.
Volkswagen Passat унаасынын айдоочусу жана үч милиционер анча оор эмес жараат алып, Бишкектеги травматология жана ортопедия илим изилдөө борборуна жаткырылды. Учурда абалдары канааттандырарлык.
