БИШКЕК, 21-апр. — Sputnik. Жибек Жолу проспектисинде эки адамды коюп кеткен айдоочу окуя болгон жерден коркуп кеткендиктен из сууткандыгын айтты. Бул тууралуу Кайгуул милициясынын маалымат кызматы билдирди.
Эскерте кетсек, кечээ Тез жардам кызматы тарабынан түнкү саат 04:00дө айдоочу жөө эки адамды сүзүп, 22 жаштагы бирөөсү мерт кеткени кабарланган. Кырсыкка кабылгандардын экинчиси оор абалда Бишкек травматология жана ортопедия илимий-изилдөө борборуна жаткырылган.
Кырсыкка себепкер айдоочу кечээ кармалып, анын милиция кызматкери болушу мүмкүн экени айтылган. Алдын ала маалыматтар боюнча ал дагы бир кырсык болгон жерге бараткан.
Жалал-Абад шаарынын 26 жаштагы тургуну киши тебелеп кеткенден кийин коркконунан токтой албай калганын айтты.
Учурда бардык материалдар ШИИБдин тергөө бөлүмүнө өткөрүлүп, ал эми унаа айып короого токтотулду.
