БИШКЕК, 20-апр. — Sputnik. Адам өмүрүн алган жол кырсыгына себепкер айдоочу кармалды. Бул тууралуу Кайгуул милициясынын маалымат кызматы билдирди.
Мурдараак тез жардам кызматы тарабынан түңкү саат 04:00дө айдоочу эки жөө жүргүнчүнү сүзүп, бирөөсү мерт кеткени кабарланган. Кырсыкка кабылгандардын экинчиси оор абалда Бишкек травматология жана ортопедия илимий-изилдөө борборуна жаткырылган.
"Кылмышка шектүү катары Жалал-Абад облусуна караштуу Базар-Коргон районунун 26 жаштагы тургуну кармалды. Алдын ала маалыматтар боюнча кармалган жаран милиция кызматкери болушу мүмкүн. Башка маалымат бере албайбыз. Ишти прокуратура карайт", — дейт маалымат кызмат.
Кармалган жаран кылмыш учурунда мас-соо экенин милиция тактаган жок.
Бул факт боюнча кылмыш иши козголду.
Прокуратура азырынча маалымат бере элек.
