Аида Салянованын жолдошу Абдыкапаров шарттуу түрдө 7 жылга кесилди

БИШКЕК, 20-апр. — Sputnik. Бишкек шаардык соту мурунку баш прокурор Аида Салянованын жолдошу Бакыт Абдыкапаровду шарттуу түрдө жети жылга эркинен ажыратуу боюнча өкүм чыгарды. Бул тууралуу соттун маалымат катчысы Гүлмира Үмөталиева билдирди.

Маалыматка ылайык, жети жылдын үч жылы сыноо мөөнөтү болуп эсептелинет. Соттолуучу аталган сыноо мезгилинин ичинде өзүн туура алып жүрсө, жаза мөөнөтү кыскартылышы мүмкүн.

Анын айтымында, сот отуруму 20-апрелде өттү. Ал эми Абдыкадыров шылуунчулук жана кызмат абалынан кыянаттык менен пайдаланган деп айтылып келген.

"Отурум судья Жаңыл Мамбеталынын жетекчилиги менен өтүп, ал өкүмдү окуду. Мындан башка расмий эч нерсе айта албайм", — деди Үмөталиева.

Шаардык соттогу маалымат булактарынын айтымында, аталган сот былтыр октябрда Абдыкапаровго карата шарттуу түрдө 7 жылга эркинен ажыратуу боюнча Биринчи Май райондук соттун чечимин күчүндө калтырган. 

Абдыкапаровго карата кылмыш иши "Тазалык" ишканасынын жетекчилигине козголгон ишти оң жагына оодаруу үчүн айрым тараптар тарабынан 50 миң доллар алынган факты боюнча 2015-жылдын 5-январында Улуттук коопсуздук мамлекеттик комитеттин тергөө башкармалыгы тарабынан козголгон. Абдыкапаровго иш Кылмыш жаза кодексинин "Бир нече адам алдын ала сүйлөшүп алып, ири өлчөмдө шылуунчулук кылуу" беренесинин негизинде күнөө коюлган.

Марттын башында УКМКнын тергөө башкармалыгы Абдыкапаровго экинчи айып таккан. Ага ылайык, Салянованын жолдошу стандартка ылайык келбеген көмүр менен камсыздоо боюнча "Электр станциялары" жана башка ат минерлерге козголгон кылмыш ишке тиешеси бар экени айтылат.