"Ата Мекен" фракциясы парламентке эки талапкерди тең алып чыгууну сунуштады

БИШКЕК, 18-апр. — Sputnik. "Ата Мекен" фракциясы төрагалыкка көрсөтүлүп жаткан эки талапкерди тең сунуштоо чечимине келди. Бул тууралуу Sputnik Кыргызстан агенттигине аталган фракция катчылыгы билдирди. 

Эске сала кетсек, төрагалыкка "Кыргызстан" фракциясы Канат Исаевди, ал эми "Өнүгүү-Прогресс" фракциясы Бакыт Төрөбаевди сунуштаган.

"Жыйынга 10 депутат катышты. Алардын бешөө Канат Исаевге, бешөө Бакыт Төрөбаевге добуш беришти. Жыйынтыгында фракция эки талапкерди тең парламентке алып чыгуу чечимине келди", — дейт катчылык. 

Буга чейин КСДП фракциясынын лидери Чыныбай Турсунбеков буга чейин эки талапкерди өз ара сүйлөшүп алууга чакырганын айткан. Ал КСДП фракциянын учурдагы позициясын ачыктаган жок. 

Эске сала кетсек, өткөн бейшемби күнү парламентте төраганы шайлоо маселеси күн тартибине киргизилген. Ал ортодо "Республика — Ата-Журт" фракциясынын депутаты Максат Сабиров спикерди шайлоону кийинки аптага жылдыруу керектигин беш ирет айтып чыккан. Жыйынтыгында добуш берүүгө болгону 59 депутат келип, кворум болбой, спикерди шайлоо кийинки аптага жылган. Ал ортодо эки талапкер ортосунда кресло талаш кызуу жүрүп жатканы айтылууда. 

Мурдагы төрага Асылбек Жээнбеков агасы премьер-министрликке көрсөтүлгөндүктөн спикерликтен өз эрки менен кеткен.