БИШКЕК, 18-апр. — Sputnik. Бүгүндөн тарта өкмөт мүчөлөрү парламенттин тармактык комитеттеринде аткаруу бийлигинин 2015-жылы аткарган иши боюнча маалымат бере турганын өкмөттүн маалымат кызматы билдирди.
Алсак, бүгүн, 18-апрелде, отчетту Жогорку Кеңештин агрардык саясат, суу ресурстары, экология жана аймактык өнүктүрүү комитети угат.
Эртең, 19-апрелде, былтыркы жылдын отчету парламенттин Отун-энергетикалык комплекси жана жер казынасын пайдалануу боюнча комитетинде, Транспорт, коммуникациялар, архитектура жана курулуш комитетинде, ошондой эле Экономикалык жана фискалдык саясат боюнча комитеттеринде каралат.
Отчетто белгиленгендей, өкмөттүн ишмердүүлүгү 2013-2017-жылдар мезгилине Кыргызстанды туруктуу өнүктүрүүнүн Улуттук стратегиясында каралган маанилүү багыттамаларды жана артыкчылыктарды ишке ашырууга багытталган.
Отчет тармактык комитеттерде жана фракцияларда каралгандан кийин Жогорку Кеңештин жыйынына сунушталат.
