БИШКЕК, 15-апр. — Sputnik. КСДП партиясынын лидери Чыныбай Турсунбеков төрагалыкка сунушталып жаткан Бакыт Төрөбаевдин да, Канат Исаевдин да каалоосу күч экенин Sputnik Кыргызстан агентигине билдирди.
Эске сала кетсек, төрагалыкка "Кыргызстан" фракциясы Канат Исаевди ал эми "Өнүгүү-Прогресс" фракциясы Бакыт Төрөбаевди сунуштаган.
"Мен жаңы эле эки талапкер менен жоугуп келдим. Өз ара сүйлөшүп көпчүлүк коалициядан бир талапкерди сунуштайлы деп айттым. Бирок экөө спикер болууну каалап турат", — дейт Турсунбеков.
Эл өкүлү Жогорку Кеңешти жетектөөгө көптөн бери сунуштар айтылып келгенин, бирок ал андан баш тартканын кошумчалады.
"Башкаларга да караш керек", — деди депутат.
Турсунбеков КСДП фрациясы көрсөтүлгөн талапкерлерди эртең карай турганын билдирди.
Ал эми мурдагы төрага Асылбек Жээнбеков агасы премьер-министрликке көрсөтүлгөндүктөн ал спикерликтен өз эрки менен кеткен.
