БИШКЕК, 14-апр. — Sputnik. Газ менен иштеген автобустар май айынан баштап ишке кире турганын мэр Албек Ибраимов шаардын негизги муниципалдык ишканаларын кыдыруу учурунда билдирди.
Буга чейин Кытайдан Бишкек шаары үчүн газ менен иштеген 10 автобус келгени кабарланган.
Шаар башчынын айтымында, мэриянын балансында ушу тапта 455 автобус бар, анын 200ү жараксыз абалга келген.
"Жаңы автобустар 105 жүргүнчүнү батырат. Ал эми жарактан чыккан унааларды капиталдык ремонттон өткөрүү үчүн аларды чыгарган завод менен сүйлөшөбүз. Биринчи кезекте 118 автобус турат. Жыл аягына чейин аларды калыбына келтиребиз", — деди Ибраимов.
Муниципалдык ишканалардын иши менен таанышуу 15-апрелде уланат.
