БИШКЕК, 6-апр. — Sputnik. Аксы районуна караштуу Итагар айылындагы Кулунчак-Сай токой чарбасында жер көчкү жүрүп, токойду басып калды. Бул тууралуу Авлетим токой чарбасынын башчысы Замир Батырбеков Sputnik Кыргызстан агенттигине билдирди.
Анын айтымында, жер көчкү катуу жаандан улам жүргөн.
"Тынбай жааган жаандын кесепетинен көмүр чыккан сайда жер көчкү жүрүп, беш гектар токойду басып калды. Көмүр чыккан жер жабыркаган жок. Жер көчкү бир арык сууну жаап калган. Учурда суу өз нугуна түшүп калды", — дейт Батырбеков.
Ал кошумчалагандай токойдо көп жылдык карагай, арча, жапайы өрүк, долоно жана башка өсүмдүктөр өсөт.
Жергиликтүү жашоочулардын айтымында, ал сайда көмүр кени табылып, бүгүнкү күндө чалгындоо иштери жүрүп келет.
