БИШКЕК, 1-апр. — Sputnik. Кыргызстандын футбол боюнча жаштар курама командасы (U-14) Алматы шаарында өткөн эл аралык турнирде биринчи орунга ээ болду. Бул тууралуу Футбол федерациясы билдирди.
Мелдеш 24-30-март күндөрү КазНАУ стадионунда өтүп, ага Казакстандын шаарларынан сегиз команда катышкан. Кыргызстандын атынан аталган мелдешке Канттын "Абдыш-Ата" клубунун тарбиялануучулары барды.
"Сегиз команда эки топко бөлүнгөн. Анын жыйынтыгы менен жарым финалдык оюндар менен финал ойнолду", — деп айтылат билдирүүдө.
Финалдык беттешүүдө КР командасы оюн талаасына буга чейин да утуп алган карагандалык "Шахтер" командасы менен чыгып, пенальтинин эсеби (4:3) менен жеңип алды. Ага чейин оюндун негизги убактысы 2:2 эсеби менен аяктаган.
Команданы Рафик Амиров машыктырат. Турнирдин мыкты оюнчусу болуп кыргызстандык команданын оюнчусу Баястан Талантбек уулу эсептелди.
